31.05.2022
31.05.2022
Спортски викенд за докторите
Успешно искачување на Водно, шах турнир во Куманово
Во организација на Комисијата за спортски активности на Лекарска комора во изминатиот викенд се одржаа два настани. Во саботата 07.05.2022г. се одржа традиционалната планинарска тура на Водно.
„Докторите кои учествуваа на настанот покажаа добра физичка кондиција и успешно го совладаа предизвикот за искачување на Водно кој и не беше лесен. Направивме краток одмор кај Крстот и уживавме во убавата панорама на Скопје, по што се вративме назад. Споделивме навистина пријатно доживување и дружење, од кое понесовме убави спомени“, истакнува д-р Љупчо Милановски, претседател на Комисијата за спортски активности.
Учесниците на планинарската тура добија дипломи за успешно остварениот предизвик, а организаторот на настанот обезбеди и брендирани маички, освежување, мала закуска и витамини.
Во неделата на 08.05.2022 година во просториите на Шаховскиот клуб во Куманово се одржа турнирот во шах. Прво место освои д-р Вело Марковски, второ место д-р Дејан Јанков, трето место д-р Мите Зафиров.
Комисијата за спортски активности упатува голема благодарност до домаќините од Шаховскиот клуб Куманово, претседателката Сања Трајковска и до Агим Шемсиу потпретседател на Шаховски сојуз на Македонија кој воедно беше во улога на судија на турнирот. По докторскиот турнир се одигра и двомеч со домаќините Шаховскиот клуб Куманово во кој победија домаќините со 26,5:22,5. И на овој настан за сите учесници беа доделени дипломи, брендирани маици, освежување, како и пехари за победниците.
