Свечено одбележан денот на Лекарската комора на Македонија
![](/upload/images/2014/IMG_0117_resize.jpg)
Во присуство на голем број гости, меѓу кои и министерот за здравство Никола Тодоров и директорката на Фондот за здравствено осигурување на Македонија, Маја Парнаџиевa – Змејкова, како и претставници на коморите и на медицинските факултети, Македонското лекарско друштво и голем број доктори, со Свечен собир, на 4 јуни, во Клубот на пратениците во Скопје се одбележа 5 јуни, Денот на Лекарската Комора на Македонија, поточно 22 годишнината од нејзиното основање како самостојна професионална асоцијација на докторите по медицина.
![](/upload/images/2014/IMG_0023_resize.jpg)
Во поздравното обраќање, претседателот на Лекарската комора, проф. д-р Кочо Чакалароски, истакна дека во изминативе 22 години, е неспорно дека Комората се наметнала како партнер во општеството и во креирањето на здравствените политики, дека се изградила како респектабилна професионална асоцијација со јавни овластувања. Според него, несомнено е дека со многу работа, енергија, залагања и знаење направено е многу, но факт е дека пред Комората стојат уште предизвици кои треба да се реализираат за ЛКМ да биде она што сите би сакале и, што оправдано, го очекуваат докторите во Македонија.
![](/upload/images/2014/IMG_0027_resize.jpg)
“Комората иницираше голем број предлози, измени и решенија во здравството и здравствената регулатива. Некои од нив успешно се реализираа, на други и натаму работиме. Така и ќе продолжиме, пред се, за се она што се однесува на здравствениот систем, здравјето, местото и улогата на докторите. Во таа насока, и овој пат ќе нагласиме дека Комората е подготвена да биде партнер во преговарањата и договарањата за прашања од интерес на докторите од областа на здравството, при подготвувањето на решенија за проблемите, но дека настојува и ќе настојува да се респектираат нејзините предлози”, истакна д-р Чакалароски. Според него, Комората како професионална докторска асоцијација и натаму ќе работи на надминување на проблемите и изнаоѓање на најсоодветни решенија низ координирана расправа и дијалог за суштинските и стратешките прашања во здравството. Како приоритети во натамошниот период, тој ги издвои, Законот за докторска дејност, заложбите за поадекватно осигурување на докторите од стручна грешка, а во тој контекст и можноста и модалитетите за бесплатна или субвенционирана правна помош на членството. Лекарската комора, нагласи д-р Чакалароски, ќе се обиде да најде место и при посредување за евентуални конфликти на интереси меѓу докторот и институциите без да навлегува во ингеренциите на Министерството за здравство, но ќе настојува да се избори да се обезбеди и поголема безбедност и заштита од вербални и физички напади на здравствените работници на нивните работни места. “Наша заложба е ЛКМ секаде и во секој момент да ги штити интересите на докторите, а угледот, материјалниот и социјалниот статус на лекарите ни остануваат приоритет... Комората останува отворена за идеи, мислења, предлози, за соработка. Во неа сите ние, како припадници на докторската професија, наоѓаме и треба да најдеме место каде што ќе ги артикулираме нашите заложби и барања. Се разбира, водејќи сметка и за општите интереси во здравството, за интересите и потребите на граѓаните, државата”, истакна проф. Чакалароски.
![](/upload/images/2014/IMG_0131_resize.jpg)
Презентација на информациите и податоците со кои располага Комората во врска со реализацијата на јавните овластувања имаше потпретседателката на Лекарската комора на Македонија, д-р Ленче Нелоска. Низ графички и табеларен приказ беа претставени податоци за вкупниот број доктори евидентирани во Регистарот на Комората, нивната застапеност според возраст, пол и национална припадност, класификации според нивоа на здравствена заштита и според специјлноста. Беа презентирани и податоци за континуираната медицинска едукација акредитирана од Комората, информација за редовниот и вонредниот стручен надзор, организациската поставеност на Комората со нејзините органи и тела, како и нивните активности остварени во изминатиот период...
![](/upload/images/2014/IMG_0215_resize.jpg)
Во рамките на Свеченоста, највисокото признание на Лeкарската комора на Македонија, Плакетата "Св. Наум Охридски" и беше врачена на д-р Лидија Стоичевска, невролог од Делчево. За прв пат беше доделена награда и за најдобар стручен и научен труд објавен во “Vox medici” во 2013 година, признание кое годинава го доби трудот „Проценка на кардиоваскуларниот ризик кај пациенти со дијабетес мелитус тип 2 со моделот на United Kingdom Prospective Diabetes Study“ од д-р Ивица Смоковски и д-р Татјана Миленковиќ.
Фото-галерија