Преговори со ФЗО за договорите за 2012 година
Исплата на 100 отсто од месечниот надомест за матичните
Фондот за здравствено осигурување секој месец место досегашните 70 отсто, на избраниот лекар ќе му исплатува 100 отсто од месечниот надомест. Гинеколозите наместо бараниот дополнителен коефициент за бремени жени, ќе добијат зголемување на поените за 100 отсто исплата од досегашните 2.500 на 3.500 поени. Во исполнувањето на целите се најавени промени, а предложено е за избраните лекари да се воведе КМЕ од областа на нефрологијата, ендокринологијата и ревматологијата. Но, претходно околу оваа новина, потребата од неа и евентуалните програмски содржини, ќе треба да се усогласат Комората и соодветните здруженија.
Ова се дел од новините кои треба да се инкорпорираат во договорите за 2012 година што ќе ги потпишуваат докторите со ФЗО, а кои произлегоа на работна средба на претставниците на Лекарската комора на Македонија со Фондот, која се одржа на 28 декември минатата година.
Претставниците на Фондот најавија дека размислуваат од 2013 година да воведат повекегодишни договори, а евентуални измени во нив да се прават со анекси наместо со нови договори. Во меѓувреме, а во функција на растоварување на докторите од дел од обврските за обезбедување на документација, е одлучено да се направат анекс-договори за периодот до 31.12.2012 година.
Лекарската комора на Македонија побара уште еднаш да се преиспита намерата исплатата на месечните трансфери од ФЗО кон закупците во здравствените домови да се “врзе” со подмирените нивни обврски по основ на закупот кон закуподавачот (здравствениот дом) за месецот кој е предмет на исплата. На ваквото становиште ЛКМ остана и по добиенто објаснување дека предлогот за воведувањето на овој нов услов не е на ФЗО, туку е барање на Министерството за здравство. На средбата е договорено Комората да достави свој официцијален став по ова прашање до наредната седница на УО на Фондот.
Кај договорите за специјлистичко-консултативната здравствена заштита е договорено да се додаде дека следењето на успешноста на работењето е на квартално ниво, а известувањето до Фондот да се доставува еднаш во годината, на крајот на договорниот период.
Исплатите на специјалистичките здравствени установи и на лабораториите останува по доставена фактура (воведена од 01. 04. 2011 год.), а не по дванаестинки за да може да се врши квартално порамнување како што се вршело во претходните периоди. Најавена е можност за квартално порамнување во 2013 година, кога Фондот ќе може да врши програмско прилагодување за да се следи кварталното остварување на планот, при што ќе биде можно во еден месец воопшто да нема остварување, но ако во другите два месеци се оствари тромесечниот план, тогаш ќе се врши исплата согласно оствареното во кварталот.
Во новите договори е вметнат член 16-а каде е извршена замена на терминот “листа на чекање” со “листа на закажани прегледи”. Таа не се однесува на пациенти кои се итни, а договорено е установите кои немаат пациенти кои чекаат да не истакнуваат листа на закажани прегледи.
Докторите имаат обврска листата на лекови што паѓаат на товар на националната здравствена каса да ја истакнат на видно место во ординацијата. Во член 19 став 1 (за намалување на бројот на боледувања до 15 дена) е извршена корекција: 3% е заменет со 2% (за договорот за гинекологија) и 2% со 1% за ПЗЗ. Според добиентите објаснувања, ова е направено врз основа на податоците со кои располага Фондот за голем број на издадени боледувања за популација од 18-34 години кои не се породилни.
Фондот за здравствено осигурување најави дека централна база на осигуреници на Фондот, кон која би пристапувале сите матични лекари заради утврдување на својство на осигурено лице за своите пациенти и за правилно пресметување на капитацијата, се планира за 2013 година кога сите ќе имаат електронска здравствена картичка и со комуникација помеѓу здравствените установи и Фондот ќе може да се врши електронски запис на нов пациент.
