Во рамките на постојаните активности делегација на Лекарската комора беше примена од министерот за здравство. Делегацијата која во отсуство на претседателот ја сочинуваа двајцата потпретседатели и претседавачот на Собранието го запозна министерот дека се усвоени правилниците со кои се регулираат јавните овластувања. Овие правилници по потпишувањето од страна на министерот и нивното објавување во “Службен весник на Република Македонија” ќе станат подзаконски акти.
На средбата беа покренати прашањата околу потребата за изземање на докторите од текстот на законот за јавни установи, донесувањето на закон за докторската дејност, просторните и финансиски услови во кои ќе се извршуваат јавните овластувања и слично. Од страна на министерот беше јасно искажана поддршката во напорите што ги презема Комората за старт на задачите што произлегуваат од јавните овластувања. Притоа тој рече дека ќе се заложи да се реализираат барањата на Лекарската комора особено оние со кои би се обезбедило несметано одвивање на работата врз јавните овластувања.
На крајот беше констатирано дека ваквите средби во иднина треба да бидат многу почести особено во ситуација кога Комората доби многу значајни функции.
