На иницијатива на членовите на Лекарската комора на Македонија, Извршниот одбор на Собранието му предложи усвојување на Декларација. Со овој документ се бара здравството да се изостави од текстот на законот за јавните установи. Главен аргумент беше дека здравството ќе мора да се прифати и да се третира како дејност од посебен општествен интерес.
Предложената Декларација членовите на Собранието едногласно ја прифатија.
Оваа декларација беше испратена до претседателот на Собранието, пртседателот на Владата, министерот за здравство, претседателот и членовите на Комисијата за здравство, до сите пратенички групи и до Канцеларијата на Светската банка во Скопје. Во продолжение ви го пренесуваме интегралниот текст на декларацијата.
Д Е К Л А Р А Ц И Ј А
Здравствената дејност е од посебен интерес за Република Македонија. Целта на здравствена дејност е заштита на здравјето на поединците, семејството и целокупното население.
Во повеќе демократски земји и во земјите во транзиција здравството е дејност од посебен интерес на државата. Во сите овие земји постои законска регулатива со која се регулира оваа дејност. Во Словенија законот за доктори е донесен во 2000 година, а во Хрватска ист таков закон е донесен во 2003 година.
Подигањето на кредибилитетот на здравствената дејност и борбата против се почестите афери во здравството подразбираат ваков чекор и ваков однос за посебно институционализирање на здравството.
Лекарската комора на Македонија смета дека е неопходно да се подготви закон за доктори во кој би се утврдило местото, улогата и функцијата на докторската дејност и докторите. Комора во изминатиот период повеќе пати подготвуваше и предлагаше посебен закон за доктори.
Поистоветувањето на докторите со државни службеници претпоставува дерогирање на усвоените измени и дополнувања на Законот за здравствена заштита донесен во март 2004 година со кои се предвидуваат специфични услови за обавување на здравствената дејност (капитационо плаќање и системот на лиценцирање и акредитација).
Од овие причини Лекарската комора на Македонија смета дека здравството како дејност треба да се иземе од предлог законот за јавни установи.
Утврдувајќи дека здравствената дејност е од посебен општествен интерес налага многу внимателно да се подготви и да се предложи соодветен модел на трансформација во здравството.
Лекарската комора на Македонија е подготвена да даде своја стручна помош при подготвувањето на законската регулатива која би ги регулирала статусот на докторите, докторската дејност и нејзината трансформација.
