Д-Р НАДА СИМОВСКА НОСИТЕЛ НА НАГРАДАТА “СВ. НАУМ ОХРИДСКИ”

Комисијата за доделување на наградата за особени постигнувања во областа на здравството “Св. Наум Охридски”, наградата за 2002 година едногласно и ја додели на примариус д-р Нада Симовска, вработена во Здравствениот дом во Пехчево.

За време на одржувањето на редовното Годишно собрание во Прилеп на 27 јуни одлуката ја соопшти д-р Тихо Матевски, претседател на Комисијата за доделување на наградата “Св. Наум Охридски” а признанието на д-р Симовска и го врачи претседателот на ЛКМ, д-р Алексеј Дума.

До Комисијата пристигнаа седум предлози поднесени од Општинските одбори на Лекарската комора на Македонија.

Комисијата одлучи носител на наградата “Св. Наум Охридски” да биде примариус д-р Нада Симовска. Според образложението на Комисијата ваквата одлука ја базирала врз основа на контакти во Здравствениот дом во Пехчево и од богатата документација приложена со кандидатурата.

Посебно се истакнати нејзината стручност, успешност при извршување на работата, ентузијазмот, упорност да го подобри нивото на здравствената култура на населението, несебичност да помогне во секоја ситуација и бескрајната хуманост.

Примариус д-р Нада Симовска студирала на Медицинскиот факултет во Скопје каде на Клиниката за детски болести ја стекнала специјализацијата по педијатрија. Од дипломирањето работи во Здравствениот дом во Пехчево. Како резултат на учеството со свои стручни трудови на домашни и меѓународни конгреси, објавени во медицински зборници и други публикации, активното учество во едукацијата за подигање на свеста на населението за сопственото здравје преку отворени емисии на локалното радио, со предавања во Централното основно училиште “Ванчо Китанов” и детската установа “7. Септември” 1999 година д-р Симовска го добива звањето примариус.

Д-р Симовска го организира и сегашниот диспанзер за доенчиња и мали деца во кој се спроведува превентивна и примарна здравствена заштита. Со своето залагање таа придонесе да се развие патронажната служба и Советувалиштето кое со успех работи во рамките на Диспанзерот. Имунизацијата благодарејќи и на нејзиното залагање се спроведува без исклучоци. Во породилиштето д-р Симовска работи и како неонатолог.

Како член на повеќе невладини организации д-р Симовска активно учествувала во многу активности.