Според информациите од седиштето на Европскиот форум на медицинските асоцијации и Светската здравствена организација се очекува Лекарската комора на Македонија од април идната година да биде рамноправен член на оваа престижна медицинска асоцијација.
Оваа информација ја доби Лекарската комора на Македонија во писмото од генералниот секретар на асоцијацијата, д-р Рене Салзберг кое во Скопје пристигна кон крајот на јуни годинава.
Во писмото, меѓу другото, Лекарската комора на Македонија е информирана дека Комитетот за врски одлучил на следната пленарна седница да ја предложи Лекарската комора на Македонија за редовен член на ЕФМА и СЗО. Следниот Форум треба да се одржи од 16 до 18 април 2004 година во Дубровник.
Претставници на Лекарската комора на Македонија и досега, меѓутоа како посматрачи, беа поканувани на речиси сите заседанија на Форумот на ЕФМА и СЗО. Последната пленарна седница на Форумот оваа година се одржа во Берлин.
