На 5. јуни оваа година се навршуваат десет години од формирањето на Лекарската комора на Македонија. Претседателот на државата, Борис Трајковски ја прифати поканата да биде покровител на манифестациите по повод јубилејот.
За одбележување на годишнината се предвидува на 6. јуни во Скопје да се одржи свечена академија на која ќе говори претседателот на Лекарската комора, професор д-р Алексеј Дума.
Поканата за конститутивната седница на Лекарската комора на Македонија од името на Иницијативниот одбор, пред десет години, ја потпиша претседателот на тогаШниот иницијативен одбор проф. д-р Јован Тофовски. На собирот на кој му претходеа повеќе од седумдесет состаноци на Иницијативниот одбор, беа усвоени основните акти на Комората, Статут, Кодекс за медицинска деонтологија и Деловник за работа на Собранието.
На Собранието присуствуваше и Киро Глигоров, тогаш претседател на Република Македонија. Поздравувајќи ги присутните тој ја поздрави и иницијативата за формирање на Комората.
Делегатите за претседател на Комората го избраа д-р Алексеј Дума, а за негов заменик д-р Драган Филиповиќ.
Собранието избра и Извршен одбор кој го сочинуваа: д-р Васко Василевски, д-р Драгољуб Велевски, д-р Бранко Глумов, д-р д-р Никола Зисовски, д-р Живко Попов, д-р Коста Секуловски, д-р Павел Сотировски, д-р Михаил Арсов, д-р Светозар Стојанов и д-р Јован Тодоров.
Петти јуни 1992 година сепак може да смета само за возобновување на Лекарската комора. Датум за востановување на лекарското здружување сигурно е 14 декемвти 1920 година кога по овластување на тогашното министерство на Кралството СХС била издедна наредба за формирање на лекарска и аптекарска комора.
Со новата територијална поделба на Кралството Југославија, 1923 година, Македонија и дел од јужна Србија стануваат Вардарска бановина или трета област. Седиштето на Комората на третата област било во Скопје.
Прв претседател на Управниот одбор на Лекарската комора е д-р Мило Иличковиќ. Во Управниот одбор покрај претседателот биле и д-р Коста Чохаџиќ (потпреседател), д-р Миодраг Јелесијевиќ (секретар), д-р Богољуб Паган (благајник) и членовите д-р Драгутин Анастасијевиќ (Скопје), д-р Ѓоѓе Пантазис (Скопје), д-р Божидар Христиќ (Скопје) и д-р Алексеј Дума (Битола). Заменици биле д-р Јанко Дракулис и д-р Асим Куленовиќ (Штип).
На свечената седница на 6 јуни се очекува да бидат доделени и благодарници на најзаслужните во формирањето и развојот на Лекрската комора во изминатите десет години.
